تجربتي الكاملة في التحويل الورقي من كليه الي اخري بعد مرور عام ( جامعة الزقازيق )

تجربتي الكاملة في التحويل الورقي من كليه الي اخري بعد مرور عام ( جامعة الزقازيق )

كنت في كليه تكنولوجيا و تنمية و حولت اداب انتساب بعد سنه كامله تمام

اول حاجه روحت علي الشئون بتاعت الفرقه الاولي في كليه التكنولوجيا و قولتلهم عايز احول قالولي تمام و ادوني اذن دفع 100 ج رسوم تحويل , دفعت الفلوس و جبت الوصل و رجعتلهم تاني ادوني ورقه عشان امضيها من المدير العام
و صورة من شهادة الثانوية العامة بتاعتي

بعد كده خدت الورقه و صورة شهادة الثانوية و طلعت علي الشئون العامة بتاعت الجامعة اللي جمب كلية تجاره
روحت علي موظف هناك و اديته الورق اللي معايا سألني عايز تحول لكليه اية ؟ قولته اداب

بص في مجموعي اللي في شهادة الثانوية بتاعتي و بعدين بص في الكشوف بتاعت التنسيق السنين اللي فاتت و شاف مجموعي جايب كلية اداب و قالي تمام و خد مني 150 ج و اداني ملف و قالي اطلع علي الموظف الفلاني

خدت الملف و مليته و كان مطلوب طوابع رحت جبتها من مكتب البريد اللي جمب المبني و رحت قدمت الملف للموظف اللي قالي عليه الموظف اتأكد من الورق و ادني وصل و قالي تعالي بعد عشر أيام

بعد عشر أيام رحت تاني قالي تمام الورق اتحول لاداب ( طبعا انا قولت الموضوع خلص هنا هه )
رحت علي شباك التحويلات بتاع اداب اللي جمب الخزنة و قولت للموظفة هناك اني حولت و بتاع ف شافت اسمي و اديتني ملف و اذن دفع مصاريف اداب انتساب ( 374 ج ) و شويه ورق كدة و قالتي املاه و في ورقه امضيها و اختمها من المدير العام
بعد معاناة مع الورق رحت علي كليه تكنولوجيا عشان اجيب الملف بتاعتي فالموظف اللي هناك خد مني الورقة اللي مضيتها و ختمتها من المدير العام بتاع اداب و اداني ورقتين و قالي برضه روح امضيهم و اختمهم من المدير العام بتاع تكنولوجيا
بعد اما خلصت الورقتين روحت لبتاع الشئون تاني اداني الملف بتاعي و خلاني امضي ان انا اخدت الملف و مسئول عنه
بعد كدة رحت دفعت المصاريف في الخزنة بتاعت اداب تمام

كدة انا معايا ( ملف نقل قيد من اداب + ورقة رغبات بتاعت اداب + وصلات المصاريف + الملف بتاعتي في تكنولوجيا )
روحت مطلع ( شهادة الثانوية + شهادة الميلاد + استمارة تأجيل الجيش +  6 صور شخصية + ورقة الكشف الطبي ) من الملف بتاعي في تكنولوجيا و حطيتهم في الملف بتاع ادب  هما و الوصلات بتاعت المصاريف و ورقة الرغبات بتاعت الأقسام لكلية اداب و رحت قدمتهم في شباك التحويلات في كلية اداب

الموظفة قالتلي تمام كدة و احضر عادي

·         الخزنة مش بتاخد فلوس يوم السبت
·         الفلوس اللي هتدفعها ( 100 ج + 150 ج + مصاريف الكلية اللي هتحول ليها )

طبعا الكلام ده كله من الذاكرة

إرسال تعليق